Boas novas!

O día 27 de maio visitou o castro e o museo de Viladonga o CEIP  San Pedro de Visma  da Coruña. Foi unha visita especial porque puidemos comprobar a accesibilidade ao castro de nenas con dificultades. Tanto a nena de cadeira de rodas como a nena invidente puideron facer a visita co resto dos seus compañeiros sen problema, cousa que nos alegrou moito.

Nas obras que se están a facer no castro acaban de acondicionar unha pequena rampla que favorece o acceso  ao interior da croa e, deste xeito, as persoas con mobilidade reducida poden  percorrer as rúas interiores e gozar moito máis da visita ao xacemento. ISTO É UNHA BOA NOVA para nós porque xa temos feito unha mellora importante. Porque o patrimonio arqueolóxico é para todos.

Por fin inauguramos a rampla de acceso. Con esta pequena modificación, damos un paso moi grande.

Inscrición para as xornadas

Ola a todos!. Continúa aberto o período de inscrición para as I Xornadas sobre a Conservación en Castros Galegos.  Xa temos 60 persoas apuntadas, e, aínda que houbo algúns problemas coas inscricións, seguide insistindo.  No caso de ter algunha dificultade podedes chamarnos aos seguintes teléfonos:  986 866 033 (BIC) ou 982 314 255 (Museo Arqueolóxico do Castro de Viladonga).

Moitas grazas polo voso interese e esperamos vervos pronto!

Visita dos alumnos do Instituto Sofía Casanova (Ferrol).

O dia 21 de maio un grupo de alumnos do Instituto Sofía Casanova de Ferrol visitaron o Museo e o Castro de Viladonga. Fixeron  as actividades do Obradoiro arqueolóxico e logo puideron colaborar na elaboración do morteiro de cal e area para a restauración que se está  a facer nas casas do castro.

Pasámolo moi ben xuntos e coas actividades  disfrutaron , aprenderon e colaboraron  na conservación do castro.

MOITAS GRAZAS

Os rapaces moi atentos as explicacións de Carolina.

Visita de escolares do colexio Manuel Falcón de Castro de Rei ao Museo Arqueolóxico do Castro de Viladonga

Os 22 alumnos de 5º e 6º de primaria, acompañados pola profesora Mª Carmen Ruíz Balado, visitaron o Museo con motivo das actividades da celebración do día internacional dos museos que se levaron a cabo durante  toda a semana do 13 ao 17 de maio e onde houbo monicreques a cargo do grupo Titirimaña co conto Perico o cangrexo e o ilusionismo do mago Rafa.

Os nenos de Castro de Rei puideron gozar primeiro coa maxia do mago Rafa e despois colaborar nos traballos de restauración que se están a facer no castro, concretamente na elaboración do morteiro de cal e area para reconstruír as casas en mal estado, axudando deste xeito á conservación do Castro de Viladonga. Foi unha visita diferente ás que fixeron outras veces, xa que estes nenos veñen a miúdo ao castro e ao museo porque son do mesmo concello de Castro de Rei.

A todos eles MOITAS GRAZAS!

O mago Rafa xa ten un novo axudante: Que empece a maxia!

Como vedes, todos queren botar unha man.

Os pequerrechos seguindo as aventuras de Perico no fondo do mar.

Engadimos un novo relator ás Xornadas sobre a Conservación en Castros Galegos

O arqueólogo D. Xosé Suárez Otero, director das escavacións no castro do Monte do Facho (Cangas do Morrazo),  incorpórase como relator para achegar tamén o punto de vista arqueolóxico ao da restauración, na charla sobre os traballos de conservación neste xacemento tan singular.

Castro do Monte do Facho

Visita dos técnicos do Servizo de Arqueoloxía da Dirección Xeral de Patrimonio Cultural

O mércores tivemos a visita de dous técnicos do Servizo de Arqueoloxía,  Xosé Ignacio Vilaseco Vázquez e Juan Antonio Cañizo Fraga, que viñeron a supervisar os traballos de consolidación do castro e, de paso, aproveitamos para comentar un pouco entre todos os problemas cos que nos atopamos e cómo se van resolvendo.

O arquéologo director Emilio Ramil explicando a proposta de escavación para alixeirar o noiro das estruturas do barrio norte.

O director do Museo Felipe Arias mostrándolles aos técnicos os restos dun muro que apareceu durante a consolidación de E43

Comentando o sistema de protección das cabeceiras dos muros coas lousas e o tepes.

Visita dun grupo da Facultade de Humanidades da USC do Campus de Lugo

O día 3 de maio un pequeno grupo de alumnos da facultade de Humanidades da USC do campus de Lugo fixo unha visita guiada ao castro de Viladonga para ver “in situ” as tarefas do “Proxecto de Acondicionamento e consolidación arqueolóxica do Castro de Viladonga”. Chegaron ás 12 horas xunto ca profesora Dolores Dopico, asidua visitante  e colaboradora do Museo do Castro de Viladonga. Foi unha visita intima polo pouco número de alumnos que, xa coñecían o museo e o castro,  agora tiveron a oportunidade de coñecer os traballos que se están a realizar con maior profundidade: o protocolo de intervención con todos os pasos a seguir, o tipo de materiais que se utilizan, os criterios de actuación onde prevalece a mínima intervención e o máximo respecto ao orixinal. Fixeron moitas preguntas e ao final contribuíron cun comentario sobre esta visita o cal agradecemos moito.

Carolina Pérez, restauradora do Museo do Castro de Viladonga, co grupo de alumnos ao comenzo da visita.

O grupo diante dunha estrutura restaurada en anteriores intervencions.

O grupo xunto a profesora Dolores Dopico.

E estes son os comentarios que nos deixaron:

https://castrodeviladonga.files.wordpress.com/2013/05/mx-2310u_20130506_101654.pdf

https://castrodeviladonga.files.wordpress.com/2013/05/mx-2310u_20130506_101559.pdf

https://castrodeviladonga.files.wordpress.com/2013/05/mx-2310u_20130506_101529.pdf

https://castrodeviladonga.files.wordpress.com/2013/05/mx-2310u_20130506_101500.pdf

https://castrodeviladonga.files.wordpress.com/2013/05/mx-2310u_20130506_101434.pdf

Ábrese o prazo de inscripción para as I Xornadas sobre a Conservación en Castros Galegos

Hoxe comeza o prazo de inscrición para as I Xornadas sobre a Conservación en Castros Galegos que terán lugar na Vicerreitoría da USC en Lugo e no Castro de Viladonga os días 14 e 15 de xuño de 2013. Estas xornadas, que nesta primeira edición levan o subtítulo “Estado actual e perspectivas de futuro”, organízanas o Museo Arqueolóxico do Castro de Viladonga e BIC Materiales e Conservación coa colaboración da Universidade de Santiago e o patrocinio da Dirección Xeral de Patrimonio (Secretaría Xeral de Cultura. Consellería de Cultura, Educación e Ordenación Universitaria da Xunta de Galicia). A inscrición é gratuíta e o prazo para facela remata o 12 de xuño. Para apuntarse cómpre descargar o boletín de inscrición en PDF, enchelo (pódese facer no propio Acrobat) e envialo ao enderezo electrónico: museo.viladonga@xunta.es. 1 crédito de libre configuración para alumnos da Universidade de Santiago.

Máis información neste mesmo blog.

Curiosidades en E42

Durante os traballos de limpeza na base do muro norte de E42 xurdiu esta lousa cun oco ben definido. ¿Elemento reutilizado?, ¿soporte para un poste?… ¡Quén sabe! A interpretación deixámola para os arqueólogos..

E a vós.. ¿que vos parece?

E seguimos coas visitas

Nesta ocasión, ademais dos alumnos  máis maiores do Colexio Luís Seoane (Oleiros), tamén tivemos unha visita internacional: Un grupo de estudantes alemáns moi curiosos, que falaban español e non pararon de facernos preguntas. ¡Esperamos que pronto veñan moitos máis!

Oscar explicándolles aos rapaces de Oleiros por que algúns muros están siglados

Os estudantes alemáns tamén preguntaron polas siglas